कुखुरा व्यवसायी संघ पूर्वी चितवनको अध्यक्षमा हरिकृष्ण खनाल चयन

चितवन । कुखुरा व्यवसायी संघ, पूर्वी चितवनको अध्यक्षमा हरिकृष्ण खनाल चयन भएका छन् । संघको छैठौं वार्षिक साधारण सभा तथा चौंथो अधिवेशनबाट खनाल अध्यक्षमा निर्विरोध चयन भएका हुन् ।

रत्ननगरमा भएको साधारण सभाबाट १७ सदस्यीय कार्यसमिति निर्विरोध चयन भएको छ। संघको विधानमा एक निवर्तमान र एक जना विशिष्ट सदस्य हुने नियम छ जसअनुसार क्रमशः भीमनारायण श्रेष्ठ र रघुनाथ भट्ट उक्त पदमा रहेका छन् ।

त्यस्तै, उपाध्यक्षमा राममणि थपलिया, महासचिवमा पुरु खनाल, सचिवमा रामचन्द्र दवाडी, कोषाध्यक्षमा हरि अधिकारी, सदस्यहरुमा क्रमसः परशुराम अधिकारी, प्रकाशमणि सापकोटा, महेश पाण्डे, बुद्धिमान विक, कृष्ण सेढाईं, अशोक पोख्रेल, अनुप विसुराल, मेघनाथ पौडेल, सुमन सुवेदी (दिलीप) र महिला सदस्यमा अन्जना केसी निर्विरोध चयन भएका छन् ।

निर्वाचन मण्डलका संयोजक तथा संघका पूर्वअध्यक्ष ज्ञानबहादुर बिसुरालले सबै मिलेर निर्विरोध समिति चयन भएकोमा खुसी व्यक्त गरे । उनले अबको दिनमा नवगठित समितिले कुखुरा व्यवसायीको हकहितमा काम गर्ने विश्वास लिएको बताए । निर्वाचन समितिमा विनोद पोख्रेल, द्रोण लामिछाने रहेका थिए ।

कार्यक्रममा उपस्थित सबैलाई स्वागत गर्दै कार्यक्रमका सभापति तथा हाल निवर्तमान भएका भीमनारायण श्रेष्ठले उपस्थित सबैलाई स्वागत गर्दै हालका दिनमा कुखुरा व्यवसाय नै धरासायी हुने स्थिति आएकोले सबै जना एकसाथ मिलेर अगाडि बढेमात्र कुखुरा व्यवसायी टिक्न सक्ने अवस्था आउने बताए ।

कार्यक्रममा प्रमुख अतिथि प्रेदश नं ३ का सांसद घनश्याम दाहाल रहेका थिए । उनले पोल्ट्री क्षेत्रमा समस्या देखिएकोले सरकारी स्तरबाट केही न केही ठोस योजना ल्याउनु पर्ने बताए ।

कार्यक्रममा विशिस्ट अतिथि प्रदेश नं ३ कि सांसद् कञ्चन खनाल, अतिथिहरूमा क्रमशः नेपाल पोल्ट्री महासंघका सचिव त्रिलोचन कँडेल, रत्ननगर नगरपालिकाका प्रवक्ता राजेन्द्र हमाल, नेपाल कुखुरा व्यवसायी मञ्चका उपाध्यक्ष रघुनाथ भट्ट, नेपाल अण्डा उत्पादक संघका केन्द्रीय अध्यक्ष शिवराम केसी, नेपाल कुखुरा बजार व्यवस्थापन समिति उपाध्यक्ष निराजन खनाल, नेपाल कुखुरा अण्डा चल्ला वितरक संघका तथा नेपाल दाना संघकाे उपाध्यक्ष विनाद पोख्रेल, नेपाल किसान संघका अध्यक्ष झलक पौडेल, उद्योग वाणिज्य संघका राजाराम रेग्मीलगायतको उपस्थिति रहेको थियो ।

Source:- nepalikoaawaj

अण्डाको मूल्य बढ्यो

काठमाडौं – उत्पादन लागतको आधारमा किसानले प्रतिफल नपाएको भन्दै अण्डा उत्पादकले कुखुराको अण्डाको मूल्य बढाएका छन्। नेपाल अण्डा उत्पादक संघका अनुसार प्रतिकार्टुन सरदर एक सय २५ देखि एक सय ७० रुपैयाँसम्म मूल्यवृद्धि भएको छ।

संघका अनुसार काठमाडौंमा ठूलो अण्डाको मूल्य प्रतिकार्टुन दुई हजार ५० र मध्यमको १८ सय ७० रुपैयाँ तोकिएको छ। एक कार्टुनमा सात क्रेट र दुई सय १० गोटा हुन्छ। यसअघि काठमाडौंमा ठूलो अण्डा १८ सय देखि १९ रुपैयाँ र सानो १६ सय देखि १७ सय रुपैयाँ कार्टुनमा बिक्री भएको संघका शिवराम केसीले बताए। ‘विगतमा मूल्य तोके पनि कार्यान्वयनमा आएको थिएन,’ केसीले भने, ‘अहिले कडाइ गरेका छौं।’ खुद्रा प्रतिगोटा १३ रुपैयाँ मूल्य निर्धारण गरिएको छ।

चितवनलाई अण्डा उत्पादनको राजधानी मानिन्छ। चितवनमा भने काठमाडौंमा भन्दा कम छ। त्यहाँ पनि अण्डाको मूल्य बढेको छ। प्रतिकार्टुन ठूलो अण्डाको मूल्य १९ सय २५ रुपैयाँ र मध्यमको १७ सय ८५ रुपैयाँ तोकिएको छ। यसअघि ठूलो अण्डा प्रतिकार्टुन १७ सयदेखि १८ सय र सानो १६ सय रुपैयाँ कार्टुनमा बिक्री भएको केसीले बताए। ‘उत्पादनको आधारमा प्रतिफल नपाएपछि मूल्य बढाएका हौं,’ केसीले भने, ‘उपभोक्तालाई ठूलो भार पर्दैन।’

संघका अनुसार प्रतिअण्डा उत्पादन लागत साढे १० रुपैयाँ पुगेको छ। यसअघि आठ रुपैयाँमा अण्डा बेच्नु पर्दा किसानले घाटा बेहोर्नु परेको थियो। मुलुकमा दैनिक ३३ लाख गोटा अण्डा उत्पादन हुने केसीले बताए। दाना, कामदारको ज्याला, ढुवानी, औषधीको मूल्य वृद्धि हुँदा लागत बढेको उत्पादकको दाबी छ। ‘गत वर्ष ४५ रुपैयाँको दाना अहिले किलोको ५६ रुपैयाँ पुगेको छ,’ केसीले भने।

मुलुक अण्डामा आत्मनिर्भर छ। अण्डा आयातमा आत्मनिर्भर भएको अवस्थामा आगामी आर्थिक वर्ष ०७७/७८ सम्ममा एक अर्ब ८३ करोड अण्डा उत्पादन गर्ने राष्ट्रिय योजना आयोगले मध्यकालीन लक्ष्य तयार गरको हो। पौष्टिक तत्वको रुपमा कुखुराका अण्डा प्रयोग हुने भएकाले उत्पादन पनि वृद्धि हुँदै गएको छ। कुखुरा र अण्डाको बजार बिस्तार भएसँगै पोल्ट्री व्यवसायमा लगानी बढेको छ। किसानले उत्पादन गरेको कुखुराको मासु तथा अण्डाले सजिलै बजार पाएर मनग्य मुनाफा हुने आसमा लगानी गरेका छन्। पोल्ट्री क्षेत्रमा एक खर्ब रुपैयाँ बढी लगानी पुगेको पोल्ट्री व्यवसायी मञ्चले जनाएको छ। पौष्टिक तत्वको रुपमा कुखुराका अण्डा र मासुको प्रयोगको लोकप्रियता सँगै नेपालमा ‘पोल्ट्री’ व्यवसायले फड्को मारेको छ। ह्याचरीमा नयाँ प्रविधि भित्रिएसँगै व्यापकता पाएको व्यवसायी बताउँछन्। सरकारले समेत यो व्यवसायलाई प्राथमिकतामा राखेर विभिन्न अनुदानका कार्यक्रम सञ्चालन गरेको छ।

कुखुरापालन अन्तरगत ह्याचरीमा नयाँ प्रविधि भित्रिएसँगै यो व्यवसाय फस्टाएको हो। चितवन, नवलपरासी, झापा, काठमाडौं, धादिङ, कास्की लगायत जिल्लामा करोडौंको लगानीमा कुखुरा फार्म सञ्चालन गर्ने लहर नै चलेको छ। सरकारी तथ्यांकअनुसार देशभर २१ हजार नौ सय ५६ फर्म व्यावसायिक रूपमा सञ्चालित छन्। यी फर्ममध्ये ९३.२९ प्रतिशत ब्रोइलर उत्पादक, ६.९ प्रतिशत लेयर्स उत्पादक र ०.५८ प्रतिशत ह्याचरी (चल्ला उत्पादक) छन्। पछिल्ला केही वर्षमा कुखुराको मासु र अण्डा उपभोग समेत ह्वात्तै बढेको छ। यससँगै व्यावसायिक प्रयोजनले कुखुरा पालन गर्ने क्रम पनि तीव्र छ।

Source:-nagariknew

अण्डाको मूल्य एकरुपता कायम गर्न त्रिपक्षीय छलफल

वीरगञ्ज/नेपाल अण्डा उत्पादक संघको नेतृत्वमा वीरगञ्जस्थित मिना बजारमा अण्डा संघका प्रतिनिधि, वीरगञ्जका अण्डा व्यवसायीहरु, विभिन्न जिल्लाका साना, ठूला अण्डा उत्पादकहरुको संयुक्त बैठक बसी आगामि दिनमा अण्डा बिक्री वितरण गर्ने विषयमा त्रिपक्षीय छलफल गरिएको छ ।

छलफलमा नेपाल अण्डा उत्पादक संघका कोषाध्यक्ष राजकुमार श्रेष्ठ, नेपाल पोल्ट्री महासंघका उपाध्यक्ष अर्जुनकुमार अर्याल, नेपाल अण्डा उत्पादक संघका निवर्तमान अध्यक्ष त्रिलोचन कँडेल, नेपाल अण्डा उत्पादक संघका पूर्व अध्यक्ष राजेन्द्र लामिछाने, नेपाल अण्डा उत्पादक संघका निवर्तमान महासचिव मदन चिरञ्जीवी पोखरेल, नेपाल अण्डा उत्पादक वितरक संघका उपाध्यक्ष विनोद पोखरेल लगायतको सहभागिता रहेको थियो ।

छलफल कार्यक्रममा आजैको मितिबाट ठूलो अण्डा प्रति पेटी २०५०, मिडियम अण्डा प्रति पेटी १८५० कार्यान्वय गर्ने, अण्डाको मूल्य चितवनलाई आधार मानी चितवनमा सम्पर्क गरी दैनिक एउटै रेटमा बिक्री वितरण गर्ने, व्यापारीले आफू खुशी अण्डाको दररेट कायम गरे जस्तोसुकै सजाय भोग्न समेत तयार रहने भन्दै प्रतिवद्धता जनाएका छन् ।
साथै आर्शिवाद टे«डर्सले नेपाल अण्डा उत्पादक संघको दररेट विपरित आफूखुशी अण्डाको दरेरट कायम गरी बिक्री वितरण गरेको पाईएकाले आजको दिन अण्डाको बिक्री वितरणमा कारोबार नगर्न र अगामि दिनमा समेत यस्ता गल्ती नदोहो¥याउन समेत सुझाव दिइएको थियोे । सुझावपछि आर्शिवाद टे«डर्सका सञ्चालकहरुले अबका दिनमा आफूबाट यस्तो गल्ती नदोहोरिने र नेपाल अण्डा उत्पादक संघले कायम गरेको दररेटमा अण्डा बिक्री वितरण गर्ने समेत बताए ।

Source:ujyalotimes

कुखुरा पालकको सफलता : २५ करोड लगानी, ४० लाई रोजगार

(चितवन) — १२/१३ वर्षको छँदा लोकल कुखुरा पाल्न थालेकी लक्ष्मी राणा २१ वर्षको हुँदा विकासे कुखुरातर्फ आकर्षित भइन् । त्यसका लागि उनी पोखरा पुगिन्, त्यहाँबाट ३५० वटा चल्ला ल्याइन् । ‘बेकक भन्ने विकासे जात थियो । त्यसले अन्डा दिन्थ्यो,’ उनले सम्झिइिन्, ‘लोकल कुखुराको सेतो अन्डा १० पैसामा बिक्री हुन्थ्यो, बेककको अन्डालाई भने २५ पैसा पर्थ्यो ।’

यो ०३६ सालको कुरा हो । त्यसबेला किनेको चल्लाको मूल्यबारे भने उनलाई हेक्का छैन । रोग वा अन्य कारणले चल्ला मर्ने डर थिएन । ल्याएका मध्ये तीनवटाबाहेक सबै हुर्किए । त्यसपछि उनले सात सय चल्ला थपिन् । हजार, दुई हजार हुँदै उनको फार्ममा कुखुराको संख्या निरन्तर बढ्न लाग्यो । चितवनमा कुखुरा पालन फस्टाउन थालेसँगै २५ वर्षअघि उनले ५० हजार लेयर्स कुखुरा राखिन् ।

‘एकपटक खोरमा ७० हजार लेयर्स थिए । अन्डा दिन सुरु गरेको दुई महिनामात्रै भएको थियो,’ उनले सुनाइन्, ‘बर्डफ्लु देखापर्‍यो । खोरका सप्पै कुखुरा नष्ट गर्नुपर्दा ठूलो घाटा लाग्यो ।’ तर उनी हार मान्ने व्यक्ति थिइनन् । निश्चित समय पुगेपछि खोर संक्रमण मुक्त भयो । त्यसपछि ५० हजार चल्ला राखिन् ।

उनै लक्ष्मी अहिले कलेजी रङको प्राडो गाडी सानसँग हुइँकाउँछिन् । ६१ वर्षको उमेरमा पनि यो व्यवसायमा उनको सक्रियता घटेको छैन । भरतपुर महानगरपालिका–९ गोन्द्राङमा रहेको आशा पोल्ट्री फार्मले अहिले मासुका लागि पालिने ब्रोइलर कुखुराको  चल्ला उत्पादन गर्छ । आरसीसी ढलान गरेको तीनतले पक्की खोरभित्र ब्रोइलर कुखुराका ५० हजार प्यारेन्ट अटाएका छन् । हप्तामा ३० हजार गोटा चल्ला उत्पादन हुन्छ । तीन वर्षअघिसम्म लक्ष्मी अन्डा दिने लेयर्स कुखुरा पाल्थिन् । उनको फार्ममा ७० हजार लेयर्स थिए ।

चितवनलाई पोल्ट्रीको राजधानीसमेत भन्ने गरिन्छ । ५० को दशकदेखि यहाँ व्यावसायिक कुखुरा पालन फस्टाएको हो । अग्रणी पोल्ट्री व्यवसायी लक्ष्मीले विकासे जातका कुखुरा पाल्न थालेको चार दशक बितिसकेको छ ।

‘लगानीका लागि रकम जुटाउन नसक्दा गाह्रो हुने हो । यस्ता अप्ठ्यारा बेलाबेलामा आइरहन्छन्,’ कुनैबेला बर्डफ्लुबाट घाटा बेहोरेकी उनी भन्छिन्, ‘वित्तीय संस्थाले सहज लगानी गर्दा संकटबाट बाहिर निस्कन सहजै भयो ।’ ठूलो मात्रामा कुखुरा पालन थाल्दा सुरुसुरुमा उनले एकैपटक ५० लाख रुपैयाँसम्म वित्तीय संस्थाबाट ऋण लिएकी थिइन् । ‘मेरो व्यवसायप्रतिको लगावले पनि लगानीकर्ता ढुक्क भएका होलान्,’ उनको बुझाइ छ, ‘वा, आरसीसी गरेको कुखुराको खोर भएकाले ऋण दिन गाह्रो मानेनन् कि ।’

उनको ह्याचरीमा अहिले २५ करोड रुपैयाँ लगानी भएको छ । जसमध्ये अधिकांश बैंकको ऋण नै हो । अविवाहित लक्ष्मीलाई व्यवसायमा माइला दाइ पदमजंग राणाले पनि सघाउने गरेका छन् । ‘महिलालाई जहाँ पनि समस्या छ, तर ती कठिनाइलाई वास्ता नगरेपछि अगाडि बढ्न सकिने रहेछ,’ उनले अनुभव साटिन् ।

आफूले चाहेका सामग्रीहरू किन्दा बाबाआमासँग पैसा माग्न नपरोस् भनेर उनले कुखुरा पाल्न थालेकी हुन् । बिस्तारै व्यवसायबाट आर्थिक रूपमा आत्मनिर्भर भइन् । अहिले सफल व्यवसायीको परिचय बनाएकी उनले फार्ममा ३०/४० जनालाई रोजगारी दिएकी छन् ।

‘बाबाआमाबाट मैले भरतपुर क्षेत्रमा १४ कट्ठा जग्गा पाएको हो । अहिले मसँग यही भरतपुर वरपर पाँच बिघा जमिन छ । त्यो सबै यही व्यवसायबाट नै भएको हो,’ आफ्नो सफलताबारे उनले सुनाइन् । पहिला देशभर भारतीय अन्डा पुगेको थियो । ५५/५६ सालमा नेपाली व्यवसायीहरू सक्रिय भएर अभियान चलाएपछि यो क्रम रोकियो । उक्त अभियानमा उनी सक्रिय रूपमा लागेकी थिइन् ।

‘अहिले उत्पादन भएको मासु र अन्डालाई बजारको समस्या छ । काम गर्न मान्छे पाइँदैन,’ उनले भनिन्, ‘व्यवसाय बढ्दैसँगै चुतौतीहरू पनि थपिँदै छन् ।’ पशुसेवा विभागबाट ०७३ सालमा सफल व्यवसासीको रूपमा सम्मानित भएकी लक्ष्मीले गत भदौमा शिखर कर्मशील किसान पुरस्कार पनि हात पारिन् ।
Source:- ekantipur.

नियन्त्रणमा लिइएका भारतीय दुई ट्रकमा अबैध कुखुराको र गाईको मासु फेला परेको छ।

नेपाल सरकार राजस्व अनुसन्धान विभाग हरिहर भवन पुल्चोकले केही दिनअघि नियन्त्रणमा लिएको UP B 3 AT 9647   र HR 55 R 4850 नम्बरका दुईवटा भारतीय गाडी खोलि त्यसमा सामान चेकजाँच गर्दा राजस्व छलेर अवैध १२ टन कुखुराको मासु र ५ टन गाईको मासु फेला परेको राजस्व अनुसन्धान विभागले जनाएको छ। उक्त रेफ्रिजेरेटरयुक्त गाडीहरूमा फ्रोजन आलु र हरियो केराउ रहेको भनी भन्सार पास गराइएको थियो ।

यसबाट आलु र केराउ भन्दै काठमाडौंमा गाई र कुखुराको मासु तस्करी भइरहेको खुल्न आएको छ।

मासु जाँचका लागि विभागले खाद्य तथा गुणस्तर विभागमा पठाउने तयारी गरेको छ। भारतबाट नेपालमा जिउदो कुखुरा तथा मासु ल्याउन प्रतिबन्ध छ।

मासु नेपालका सोल्टी, हायात लगायतका होटलहरुको लागि ल्याएको खुल्न आएको विभागले जनाएको छ।

ती होटलहरूले राजस्व छलेर बाहिरबाट मासु अवैध तरिकाबाट मगाउने गरेको गुनासो आएपछि चलाइएको अभियानमा २ वटा गाडी विभागले नियन्त्रणमा लिएको हो।

तारे होटलले झिकाएका ती सामान त्यसरी फेला पर्नुले नेपालमा व्यवसायीहरूले गर्ने अनियमितता उजागर भएको छ ।

अबैध भारतीय कुखुराको मासु तस्करीको आशंकामा दुई ट्रक नियन्त्रण

कुखुराको मासु अवैध रुपमा भारतबाट नेपालमा तस्करी गरेको आशंकामा राजश्व अनुसन्धान विभागले दुई ट्रक नियन्त्रणमा लिएर छानबिन थालेको छ । विभागले मंगलबार भारतबाट आउँदै गरेका दुई ट्रकलाई नागढुंगाबाट नियन्त्रणमा लिएको हो । यूपी बि ३ एटी ९६४७ र एआर ५५ आर ४८५० नम्बरका ट्रक चालकसहित विभागले नियन्त्रणमा लिएर छानबिन थालेको हो ।

फ्रोजन आलु, हरियो केराउ भन्दै उनीहरुले कुखुराको मासु नेपालमा तस्करी गरेको विभागको आशंका छ । ‘बोनलेस चिकेन अवैध रुपमा ती ट्रकमा तस्करी हुने गरेको सूचना छ,’ विभागका महानिर्देशक दीर्घराज मैनालीले भने, ‘ट्रक खोलिसकेका छैनौँ धनीलाई बोलाएर खोल्ने छौँ ।’ सर्लाहीस्थित भन्सार कार्यालयबाट ती ट्रकको भन्सार पास भएका थिए । विभिन्न सामानभित्र लुकाएर काठमाडौंमा अवैध रुपमा उनीहरले कुखुराको मासु तस्करी गर्दै आएको आशंका गरिएको छ ।

Source:-nayapatrikadaily

अविनाश पोल्ट्रीले बनायो सुलीबाट अर्गानिक मल

गाजीपुर । भरतपुर महानगरपालिका १८, गाजीपुरमा रहेको अविनाश पोल्ट्री फार्म प्रालिले फार्मबाट निस्केको सुली तथा फोहोरबाट अर्गानिक मल उत्पादन गरेको छ । फोहोरको व्यवस्थापनसँगै त्यहाँबाट फैलिने दुर्गन्धबाट स्थानीय बासिन्दाले पनि मुक्ति पाएका छन् ।

पोल्ट्री फार्मले रू पाँच करोडको लगानीमा जर्मन प्रविधिको उपकरणले सुली व्यवस्थापन गरेर अर्र्गािनक मल बनाउने नयाँ प्लान्ट तयार गरेपछि स्थानीयहरुले दुर्गन्धबाट मुक्ति पाएका हुन् ।

भरतपुर महानगरपालिकाकी मेयर रेनु दाहालले सोमबार नयाँ प्लान्टको स्वीच अन गरेर शुभारम्भ गरिन् । प्रमुख जिल्ला अधिकारी जीतेन्द्र बस्नेत, जिल्ला प्रहरी प्रमुख दानबहादुर मल्ललगायतले सुली व्यवस्थापन र नयाँ प्लान्टको निरीक्षण गरेका थिए ।

पोल्ट्री महासंघका अध्यक्षसमेत रहेका फार्मका सञ्चालक गुणचन्द्र विष्टले सुली तथा फोहोर व्यवस्थापनका लागि अत्याधुनिक जर्मनीको पोल्टेक कम्पनीको प्लान्ट नेपालमै प्रथम प्रयोगका रुपमा सुरू गरेको बताए ।

सञ्चालक विष्टले दुर्गन्धबाट स्थानीय बासिन्दा अब मुक्त हुने दाबी गरेका छन् । ‘दुर्गन्धकै कारण थप चल्ला हालेको थिइनँ, दुई सेट (कुखुरा खोर) खाली नै छ अझै पनि’, उनले भने । उनले अविनाश पोल्ट्री फार्मले दैनिक एक लाख ८० हजार कुखुरा तथा २ लाख ५० हजार अण्डा उत्पादन गर्ने गरेको र अत्याधुनिक उपकरणको प्रयोगसँगै उत्पादन पनि बढ्ने बताए ।

सुली व्यवस्थापन गरेर दैनिक २०/२५ टन अर्र्गािनक मल उत्पादन गरेर स्थानीय बजारमा पु¥याउने बताउँदै सञ्चालक गुणचन्द्र विष्टले नयाँ–नयाँ प्रविधिको प्रयोगले उत्पादन लागत कम पर्ने र पुरानै उपकरणहरुले उत्पादन लागत बढाउने बताए ।

भरतपुर १८, नारायणी तट गाजीपुरमा करिब ७ वर्षअगाडि सञ्चालनमा आएको उक्त फार्मबाट विसर्जन हुने सुली करिब १.५ बिगाहा क्षेत्रमा डम्पिङ गरिँदै आएको र सो कुखुराको सुलीको दुर्गन्ध वडा नं १७, १८ र २६ को ४ किलोमिटर टाढासम्म फैलेको हुँदा गाजीपुर, सिम्रीटाउन, भुवनबस्ती क्षेत्रका बासिन्दाहरु अति नै प्रभावित भएको भन्दै सुली तथा फोहोरको उचित व्यवस्थापनको माग भएको थियो ।

Source:-echitwanpost

भारतबाट अवैध रुपमा नेपाल भित्र्याउँदै गरेको चल्ला बरामद ।

काठमाडौं : पर्साको बिन्दवासिनी गाउँपालिका-४ अमरपट्टीबाट प्रहरीले बोइलर कुखुराको चल्ला मंगलबार विहान बरामद गरेको छ । मंगलबार विहान ३ बजेको समयमा अरमपट्टी प्रहरी चौकीबाट खटेको प्रहरीको गस्ती टोलीले भारतबाट अवैध रुपमा नेपाल भित्र्याउँदै गरेको ५५४४ वटा कुखुराको चल्ला बरामद गरेको जनाएको छ । ३ ४ जनाको समूहमा रहेका मानिसले टाउकोमा कार्टुनभित्र चल्ला राखेर ल्याउँदै गरेको अवस्थामा प्रहरीको गस्ती टोली देखिपछि उनीहरु चल्ला छाडेर फरार भएको प्रहरीले जनाएको छ ।बरामद गरिएको कुखुराको चल्लालाई आवश्यक कारबाहीका लागि पशु क्वारेटाइन चेकपोष्ट सिर्सिया बुझाउने कार्य भइरहेको प्रहरीले जनाएको छ ।

Source:- nsonlinekhabar

किसान र व्यवसायी बीच सहमती : अण्डाको मूल्य प्रतिगोटा १२ रुपैयाँ

काठमाडौँ  । नेपाल दाना, अण्डा, कुखुरा वितरक सङ्घ केन्द्रीय समितिले अण्डाको नयाँ मूल्य कायम गरेको छ । सङ्घले काठमाडौँमा आयोजना गरेको बृहत अन्तरक्रिया कार्यक्रममा किसान र व्यवसायीबीचको सहमतीपछि नयाँ मुल्य कायम गरिएको हो । नयाँ मूल्य अनुसार अबदेखि उपभोक्ताले प्रतिगोटा १२ रुपैयाँमा अण्डा पाउनेछन् ।

कायम भएको नयाँ मुल्य अनुसार विक्रिवितरण नगर्नेलाई कार्वाही गर्ने संघले जनाएको छ । आजै मुल्य लागु गर्न व्यवसायीको तर्फबाट सूर्यमान शाक्य र किसानको तर्फबाट पिताम्बर सञ्जेलको संयोजकत्वमा अलग अलग ७/७ सदस्ययी समिति गठन गरिएको छ ।

किसानहरु धेरै समयदेखि अण्डाको रेट नपाएर व्यवसायी धरासायी भएको अवस्थामा नेपाल दाना, अण्डा, कुखुरा वितरक संघले काठमाडौँमा आम उत्पादक, सप्लार्यसहरु भेला गरेको संघका अध्यक्ष तेजनारायण पाण्डेले बताए ।

अण्डाको रेटको लागि सबै मिलेर जादाँ रेट पाईन्छ भन्ने सोचले किसानहरुलाई अण्डाको रेटको विषयमा कार्यक्रम गरेको उनले बताए ।

नेपाल दाना, अण्डा, कुखुरा वितरक संघकै पहलमा भएको मूल्य वृद्धिले किसानले वास्तविक मूल्य पाउनेमा कुनै शंका नरहेको संघका अध्यक्ष पाण्डेले बताए । नेपाल पोल्ट्री महासंघका उपाध्यक्ष अर्जुन अर्यालले आफै अग्रसर भएर मूल्य वृद्धि गरिएको र यसलाई कार्यान्वयन गर्न सबै पक्ष लाग्नुपर्नेमा जोड दिए ।

कार्यक्रममा सहभागी किसान तथा सप्तार्यसहरुले अण्डा संघको विवादमा पक्ष विपक्ष हुदाँ समग्र पोल्ट्री क्षेत्रलाई असर गरेको निस्कर्श निकालेका छन् । भने मुल्य निर्धारण र अनुगमनका लागि आफै सर्वपक्षिय समिति समेत गठन गरेका छन् ।

उनीहरुले अण्डा विकाउने नाममा केहि खराब किसान र व्यवसायीकै कारण मुल्यमा आफु खुसी गर्दा समस्या परेको बताएका छन् ।

यसअघि भदौँ ३१ गते सोही संघले चितवनमा देशव्यापी रुपमा उत्पादक, सप्लार्यस, वितरकहरुको भेला राखी घट्दै २२० रुपैया पुगेको अण्डाको क्रेट रेटलाई वृद्धि गरि २५० किसान रेट कायम गरेका थियो ।

त्यसको कार्यान्वयनको लागि काठमाडौँको किसानहरुलाई जानकारी गराई काठमाडौँका किसानहरुले पाउने रेट २ सय ६५ रुपैया प्रति क्रेट हुन जान्छ संघको बरिष्ठ उपाध्यक्ष एवं कार्यक्रम संयोजक विनोद पोख्रेरलले भने, ‘सोही रेट कार्यान्वयन गर्न अन्र्त्क्रिया कार्यक्रम आयोजना गरेको हौँ ।’

संघका अध्यक्ष पाण्डेको अध्यक्षतामा भएको कार्यक्रमको प्रमुख अतिथिमा दाना उद्योग संघका केन्द्रीय अध्यक्ष रविन पुरी रहेका थिए ।

कार्यक्रममा व्यवसायिक मञ्चका उपाध्यक्ष रघु भट्टले मुल्य निर्धारण मात्रै समस्याको समाधान नभई राज्यले निर्धारण गरे अनुसार उत्पादित अण्डाको जिम्मेवारी लिनुपर्नेमा जोड दिए ।

कार्यक्रमका प्रमुख अतिथि नेपाल दाना उद्योग संघका केन्द्रीय अध्यक्ष रविन पुरीले सबै मिलेर समस्याको समाधान गर्नुपर्नेमा जोड दिँदै संघको कार्यक्रमको प्रशंसा गरे ।

अण्डाको बजार अनुगमन समितिका संयोजक मदन पोखरेलले देशका सबै व्यवसायि किसान तथा वितरकहरुसँग छलफल गरेर मूल्यमा एक रुपता ल्याउने बताएका छन् ।

कार्यक्रममा पोल्टी महासंघका उपाध्यक्ष अर्जुन कुमार अर्याल, राष्ट्रिय कुखुरा विक्रिवितरण संघका अध्यक्ष जंगबहादुर बेलबासे, व्यवसायिक मञ्चका वरिष्ठ उपाध्यक्ष राजेन्द्र लामिछाने लगायतको सहभागिता रहेको थियो ।

Source:-kalikadainik